Jashtë selisë rozë ku u zhvillua takimi i sekretarëve të rinj me kryetarin e partisë Edi Rama, Sekretari i Përgjithshëm i sapo zgjedhur, Damian Gjiknuri, ka reaguar për herë të parë pas marrjes së kësaj detyre të re. Ai tha se detyrat e reja të ndara në PS nuk kanë pasur për qëllim që të zvogëlojnë apo rrisin një politikan të caktuar. Ndër të tjera, Gjiknuri zbuloi se muaji janar do ta gjejë partinë me strukturim dhe status të ri.
“Faleminderit për interesimin, kjo e sotmja ishte një mbledhje e parë, një mbledhje prezantuese me sekretarët e rinj dhe me kryetarin e partisë. Për të strukturuar partinë në mënyrë të tillë që të përballohen sfidat që e presin për mandatin e tretë. Është e vështirë dhe angazhimi i Partisë Socialiste do të jetë një garanci e fortë që kjo parti të mbetet një parti lider në Shqipëri.
Qëllimi i afatit 100 ditor është për të përmbushur të gjitha kërkesat, dhe për të dalë me një platformë që do të dojë edhe vite për tu implementuar. Të gjitha partitë e kanë aftësinë kur të vijnë zgjedhjet dhe për të testuar aftësitë organizative të partisë.
Fillimi i vitit do na gjejë me një statut të ri, me një organizim të ri. Për t’ju përgjigjur sfidave të mandatit të tretë. Ka pasur probleme për të cilat duhet të reflektojmë”, tha Gjiknuri.
