Në 75-vjetorin e Çlirimit të Shqipërisë, teksa ndodhej në Pavijonin e Luftës Antifashiste Nacionalçlirimtare të Muzeut Historik Kombëtar, zëvendëskryeministri Erion Braçe theksoi se Lufta Nacionalçlirimtare na vuri në anën e duhur të historisë.
“75-Vjetori i Çlirimit do të vijë përmes këtyre aktiviteteve si një ngjarje që e ka vendosur Shqipërinë drejt në historinë e kombeve në Luftën e Dytë Botërore. E ka pozicionuar drejt edhe në krahun e duhur të historisë, edhe falë kontributeve të jashtëzakonshme të heronjve të Luftës Nacionalçlirimtare. Fituesi është një djalë i ri, mirëpo edhe Lufta e zhvilluar këtu edhe 80 vite më parë, është veçanërisht meritë e brezit të ri të asaj epoke, që u angazhua kundër fashizmit. Shumica prej tyre ishin në një moshë të re. Ishin djem dhe vajza, që u bashkuan për të përballuar pushtimin fashist edhe nazist”, deklaroi Braçe.
Zëvendëskryeministri pohoi gjithashtu se prej ditës së sotme Shqipëria hyn në dy muaj të rëndësishëm të festimeve, që kanë në fokus jetësimin e ngjarjeve të Luftës Nacionalçlirimtare: “Ajo që ka ndodhur gjatë Luftës së Dytë Botërore, për dikë që ka lind pas viteve ‘90, por edhe para, është një ngjarje që mund të mos thotë shumë, pikërisht për këtë arsye këto aktivitete vlejnë. Vlejnë për të treguar se në këtë vend është luftuar e pushtuesit nuk kanë qenë kalimtarë, vlejnë po ashtu për të thënë se në këtë vend është tradhtuar dhe tradhtarët kanë qenë anëtarë të qeverive kuislingë. Këto qeveri kuislinge nuk kanë qenë kot. Edhe nga pikëpamja formale, kanë ndërmarrë akte që janë firmosur qartazi nga qeveritë e asaj periudhe. Nuk mundet që të kalojë kaq lehtësisht, pasi ato qeveri i shpallën luftë Francës, Britanisë, Shteteve të Bashkuara të Amerikës”.
