Deputeti socialist Erjon Braçe ka propozuar bërjen e vaksinës me detyrim, ndodhur në kushtet kur pjesa masive e qytetarëve nuk respektojnë masat anti-covid. Me tone të ashpra, ai tha se shkeljet abuzive ndodhin që në Kuvend, ku pjesa dërrmuese nuk mban maskat, e më tej edhe në lokalin ku mblidhen deputetët.
Braçe duke bërë një pasqyrim të situatës në vend, ku nuk ka respektim të fashës së orarit, distancimit e mbajtjes së maskës, e gjen me vend që qytetarët e pa vaksinuar të mos vazhdojnë më në këtë gjendje. Sipas tij, situata do të vijojë e do të rëndohet edhe më tej, duke i bllokuar lirinë atyre që janë të imunizuar.
“Sot bëra një kontroll në websitet e qeverisë, për të kontrolluar masat e fundit që janë në fuqi për t’u zbatuar. Ka një kakofoni të akteve që ndodhen online, por ajo që është më e rëndë është që masat në këtë vend nuk zbatohen më.
Duke filluar nga kjo sallë. Këtu jemi në Parlament, dhe sipas rregullave në fuqi këtu duhet të mbahen maskat. Këtu pashë kryeministrin dhe disa deputetë, nuk bëhen as 5 deputetë bashkë që mbajnë maskën. Po të dalësh edhe të shkosh në klubin e Parlamentit, jo vetëm që nuk mbajnë maskë, por dikush mendon se tymi i duhanit që konsumohet atje të mbron nga koronavirusi. Kur nuk zbatohen masat këtu, mos kërkojë kush që të zbatohen masat në çdo cep të Shqipërisë.
Kemi vendosur një rregull, vaksinimi. Ka deputetë që janë të pavaksinuar. Pak janë, por ka. I kërkoi njeri testin për të hyrë në Kuvend? Natyrisht që jo. Temperatura matet atje dhe asgjë tjetër. Kemi masë për orën policore 23-6 të mëngjesit. Nuk zbatohet. Zero, dhe të penalizuarit e di kush janë? Të vaksinuarit. Kanë respektuar rregullat janë vaksinuar, janë imunizuar dhe kufizojnë lirinë e tyre për shkak se virusi po qarkullon tek të pavaksinuarit.
Grumbullimet nuk lejohen as me më shumë se 10 veta, dhe as më shumë se 50. Kjo nuk zbatohet në asnjë ambient. Nuk zbatohet asgjëkundi, as në sheshin qendror të Tiranës, as në panair tani, nuk zbatohet as në stadiume. Një gjë kam, vaksinim me detyrim.
Do të mbash biznesin hapur, vaksino punonjësit. Do të punosh në restorant, prit vetëm ata që janë vaksinuar, duke nisur nga kjo sallë deri në çdo zyrë të shtetit dhe duke përfunduar tek të moshuarit, ata që po humbin jetën”, tha Braçe.
