Ndryshe nga çfarë është diskutuar gjatë ditëve të fundit, ku kryefjala është pandemia dhe përballja me këtë flamë, kryeministri Edi Rama sot ka folur për ujin. Në një konferencë për infrastrukturën e ujit të pijshëm, Rama u shpreh se brenda pranverës do të hapen kantiere të tjera, që do të garantojnë 24 orë ujë të pijshëm.
Ai tha me ironi se bota po shkon në Hënë, dhe ne ende flasim për ujin e pijshëm. Rrjetet e trashëguara janë që në vitet ’60, ndërsa Rama shtoi më tej se janë drejt përfundimit të investimit.
“Në vitin e ardhshëm, 55 zona të mëdha urbane të vendit, në vitin 2022 edhe në mbi 200 zona më të populluara të vendit, do të kemi këtë infrastrukturë. Shumëkush që ndjek faqen time dhe që përfaqëson një kategori të caktuar të opinionit publik, ngre pyetjen herë me ironi dhe herë në formë habitore, se si ka mundësi që akoma flasim për ujë të pijshëm, kur bota po shkon në Hënë.
Bota ka shkuar në Hënë me kohë, por në sistemin tonë të ujësjellësve, kemi një pasqyrë shumë të posaçme në raport me botën, por jo me rajonin. Rrjetet e trashëguara janë të trashëguara që në vitit ’60.
As në komunizëm nuk është garantuar uji 24 orë, apo në çdo pikë banimi të Shqipërisë. Për më tepër, ne për 25 vjet, pas rënies së komunizmit, kemi filluar të prekim një sistem furnizimi me ujë, ku kemi pasur dhe akoma sot aty ku vazhdon puna, ka depo dhe tubacione të viteve ‘60-70″, tha Rama.
