Bota kujton krimet e luftës së dytë botërore me rastin e 75 vjetorit të çlirimit të burgosurve nga kampi i përqendrimit në Aushvic. Krerët e shteteve nga e gjithë bota janë mbledhur në Jerusalem për të qenë të pranishëm në këtë ceremoni përkujtimore, në nderim të atyre që humbën jetën në kampin famëkeq.
Në mesin e pjesëmarrësve janë: presidenti rus Vladimir Putin, ai francez Emmanuel Macron, Princi i Britanisë së Madhe Charles, nënpresidenti i SHBA-së, Mike Pence si dhe presidentët e Gjermanisë, Italisë dhe Austrisë.
Forumi Botëror i Holokaustit është tubimi më i madh në përkujtim të Holokaustit dhe luftimit të antisemitizmit në ditët moderne.
Megjithatëtë, presidenti polak, Andrzej Duda nuk pranoi të marrë pjesë, në shenjë pakënaqësie që nuk iu lejua të marrë fjalën, ndërsa përfaqësuesit e Rusisë, Francës, Britanisë, Shteteve të Bashkuara dhe Gjermanisë do të mbajnë fjalime.
Organizatorët izraelitë thanë se vetëm katër aleatët e Luftës së Dytë Botërore dhe Gjermania do të flasin në këtë ngjarje.
Më shumë se 1 milionë njerëz, shumica e tyre hebrenj, u vranë në kampin e përqendrimit Aushvic-Birkenau gjatë okupimit të Polonisë nga Gjermania naziste. Gjashtë milionë hebrenjë u vranë gjatë Holokaustit.
“Vrasja e gjashtë milionë hebrenjve nga regjimi brutal dhe antisemitik nazist filloi me një erozion të ngadaltë të të drejtave dhe normalizimin e diskriminimit. Ne nuk mund të lejojmë që kalimi i kohës të zvogëlojë vendosmërinë tonë për të mos lejuar që tmerre të tilla të ndodhin përsëri”, tha presidenti i Izraelit, Reuven Rivlin.
