Operatori i Shpërndarjes së Energjisë Elektrike do të shtyjë afatin e aplikimit të skemave lehtësuese të pagesës me këste të detyrimeve të prapambetura për të gjithë abonentët.
Kjo strategji pritet që të lehtësojë qytetarët, të cilët ende nuk kanë shlyer detyrimet ndaj OSHEE.Lajmi konfirmohet nga burime brenda këtij institucioni, të cilët thanë se pritet një vendim i Këshillit Mbikëqyrës për të përcaktuar detajet.
“Të njëjtat burime shtuan se propozimi është që afati i ri do të jetë dhjetori i vitit 2018, ndërsa shtuan se po shihet mundësia e hartimit dhe të të tjera skemave për t’iu përshtatur nevojave të abonentëve debitorë”-shkruan Scan.
Afati i fundit për shlyerjen me këste të detyrimeve të krijuara nga janari 2007 deri në dhjetor 2016 përfundonte në datën 31 dhjetor të këtij viti, por me vendimin e ri krijohet mundësia për të përfituar ende prej tyre.
Sakaq, për t’u vendosur mbetet edhe politika që do të ndiqet me borxhet e krijuara përgjatë këtij viti, të cilat deri më tani nuk ishin pjesë e skemave lehtësuese, por gjërat po shkojnë drejt një ndryshimi.
Referuar skemave aktuale, për ata abonentë që shprehin vullnetin të kryejnë pagesën e menjëhershme të detyrimit, përfitojnë reduktim të kamatëvonesës në masën 50%. Gjithashtu, konsumatorët jofamiljarë kanë mundësi që të shlyejnë me këste fikse mujore detyrimin e krijuar.
Një tjetër skemë që aplikohet në këtë kuadër është edhe ajo e reduktimit të kamatë vonesës kundrejt pagesës totale të saj në vlerën 100 lekë për konsumatorët e kategorisë biznes i vogël, të cilët janë debitor kundrejt OSHEE, vetëm për vlerën e kamatëvonesës.Sipas kompanisë, aplikimi i tyre, përveç përfitimeve nga ana e abonentëve ka sjellë edhe reduktimin e borxhit të vjetër, duke rritur të ardhurat.
