Lëvizja Socialiste për Integrim ka mbledhur Komitetin Drejtues për përgatitjet e zgjedhjeve të 18 qershorit.
Gjatë fjalës së tyre, Petrit Vasili dhe Ilir Meta, kanë lëshuar deklarata të forta. Vasili ka sfiduar drejtpërdrejt Partinë Socialiste, teksa u shpreh se objektivi i LSI-së është që të dalë forcë e parë politike në zgjedhjet që do të mbahen më 18 qershor.
“Objektivi ynë është LSI forcë e parë në zgjedhjet e 2017. Kushdo që e dëgjon objektivin kërkon të dëgjojë edhe Pse-në. LSI punon me bindje për të ardhmen e shqiptarëve. LSI ka punuar dhe punon me bindje për të ardhmen e shqiptarëve. Kjo fillon tek rinia shqiptare. Ka një liri që ekziston, ecën dhe na prin në gjithë territorin. Një Shqipëri me të ardhme, është një Shqipëri me rini. Ne nga sot startojmë me skuadrat tona, punën për të ecur përpara”, tha Vasili.
Ndërsa Meta, gjatë fjalës së tij, tha se Vasilin mund të bëhet njëshi i qeverisë. Më pas, ai shtoi se po bënte shaka, duke e thumbuar kështu kreun e qeverisë, Ramën.
“Me Petrit Vasilin në krye, LSI do të njohë vetëm rritje. T’i japim shans Vasilit të jetë njësh i LSI-së, me përkrahjen tuaj mund të bëhet edhe njësh i Qeverisë. Bëj shaka, ju e zgjidhni vetë kë doni kryeministër”, u shpreh Meta.
