Një ngjarje e rëndë u regjistrua mbrëmjen e djeshme në Pogradec, teksa një e moshuar u vra në mënyrë makabre nga djali i saj.
BalkanWeb raporton se ky krim ka ndodhur në prani të mbesës së viktimës, e cila është vetëm 15 vjeçe.
Vajza e mitur ka dëshmuar momentin kur i ati, Olsi Çekiçi, 44 vjeç, sulmoi me thikë gjyshen, Firdes Çekiçi. Ajo ka njoftuar me telefon policinë, teksa është larguar menjëherë nga banesa me një biçikletë nga frika.
Në momentin që policia ka mbërritur në banesë ka gjetur autorin e krimit, duke tentuar të vrasë të vëllanë, ndërsa e ëma kishte ndërruar jetë. Ndërhyrja e menjëhershme e patrullës bëri që ngjarja të mos kishte përmasa edhe më të mëdha.
15-vjeçarja ka treguar për policinë se i ati e ndiqte gjyshen nëpër shtëpi me thikë dhe i thoshte ‘boll jetove’.
Autori i krimit, i cili vuan nga shëndeti mendor, ka qenë i dënuar në Itali për drogë dhe vjedhje në vitin 2013. Ndërsa prej vitit 2017 ai ishte kthyer në Shqipëri.
