Seanca parlamentare nisi me një replikë midis kreut të Konservatorëve, Kujtim Gjuzi dhe kreut të Kuvendit, Gramoz Ruçi. Debati mes palëve nisi për shkak të bojkotit të opozitës gjatë seancës së kaluar.
Gjuzi akuzoi Ruçin, se e gjitha ndodhi pasi nuk iu dha fjala deputetit Myslim Murrizi. Nga ana tjetër, Ruçi u përgjigj se kishte respektuar rregulloren.
Gjuzi-Në rregullore ju keni të drejtë ti jepni fjalën deputetëve dhe të mos mbivendosni fjalën. Seancën e kaluar pati një reagim të ashpër të deputetëve në Kuvend. Ajo që solli atë pështjellim ishte momenti kur ju nuk dhatë fjalën Myslim Murrizit, dhe ndodhi që në rastet kur kishte diskutime të rëndësishme. Do t’ju lutesha që të mos ndodhi më.
Ruçi-Unë zbatoj vetëm rregulloren. Kushdo që ka kontestime, ka institucione Kuvendi ku mund të paraqisni ankimet tuaja. Ju mund të përdorni të gjithë mekanizmat. Askush s’ka të drejta të pakufizuara dhe unë thjesht ju dëgjoj, këtu jam.
