Gjykata e Tiranës ka dënuar me tre vite burg këngëtarin Bojken Lako. Raportohet se Lako është dënuar për akuzën “ndërtim i paligjshëm” me qëllim fitimin.
Vendimi me burg do të konvertohet me tre vite shërbim prove. Veç dënimit me burg, Lako është dënuar edhe me një gjobë prej 500 mijë lekësh nga IKMT. Ngjarja e ka zanafillën 1 vit më parë, ku kompozitori kishte marrë një godinë me qira, me qëllim rikonceptimin në një studio muzikore.
“Në rastin konkret rezulton se shtetasi Bojken Lako ka kryer punime që kategorizohen si punime që kërkohet pajisja me leje ndërtimi sipas nenit 11 të VKM-së 408 ‘Për Miratimin e Rregullores së Zhvillimit të Territorit’.
Punimet e kryera nga shtetasi Bojken Lako konsistojnë në krijimin e një strukture të re, duke ndërtuar mure, hapur dritare, kasat e dyerve dhe instalimet elektrike. Shtetasi Bojken Lako nuk ka aplikuar për leje ndërtimi, por thjesht është mbështetur tek një kërkesë e Njësisë Administrative Nr.7.
Siç rezulton nga deklarimet e shtetasit Bojken Lako, proces-verbali për kqyrjen e vendit të ngjarjes dhe tabela fotografike, punimet e kryera nuk janë punime të brendshme, por është ngritur një ndërtim i ri tërësisht e ndryshme nga ajo e mëparshme”, sqaron gjykata.
