Ben Blushi ka sulmuar ashpër Metën, sot, gjatë fjalës së tij në Kuvend. Kreu i LIBRA-s tha se ky Parlament do të mbahet mend si Parlamenti me më shumë kriminelë.
“Ky sistem po bie, nuk bën dot zgjedhje, nuk bën drejtësi, nuk ndëshkon askënd. Shqipëria ka marrë kthesë të jashtëzakonshme, është më keq se më parë. Është rritur nevoja për të ikur. Ky Parlament nuk ka funksionuar asnjë ditë, dhe do mbahet mend si Parlamenti me më shumë kriminelë. Kjo që po ndodh, iu thotë gjithë të rinjve “ikni”. Kjo republikë po e fundos Shqipërinë, ndaj nuk duhet të vazhdojë”, tha Blushi.
Gjithashtu, ai e quajti republikën si “Republika e Likes” dhe theksoi se kjo nuk është ajo që duan shqitarët dhe këtë republikë duhet ta rrëzojnë me votë, gjithë ata që mendojnë për të ardhmen e vendit dhe fëmijëve.
“Njeriu që duhet të bënte më shumë për të zgjidhur këtë krizë, ai nuk bëri asnjë gjë, u bë President. U bëre President i asaj Republike që nuk bën dot zgjedhje të lira, në atë që ka bllokuar zgjedhjet, në atë Republikë, ku askush nuk ndëshkohet dhe kjo është arsyeja pse votova kundër”, tha Blushi.
