Policia ka bllokuar një makinë tip “Lamborghini” me vlerë rreth 200 mijë euro, në pronësi të një 36-vjeçari nga një fshat pranë Elbasanit.
Ky mjet luksoz është bllokuar, pasi dyshohet se është blerë me të ardhura që kanë burim aktiviteti të jashtëligjshëm.
Bllokimi i makinës është bërë sipas parashikimeve të ligjit “Për parandalimin dhe goditjen e krimit të organizuar dhe trafikimit nëpërmjet masave parandaluese kundër pasurisë”.
Bëhet me dije se mjeti ndodhet në komisariat, ndërsa policia ka nisur hetimin pasuror për 36-vjeçarin, për të vërtetuar ose hedhur poshtë akuzën ndaj tij. Deri në këtë moment, makina luksoze do të qëndrojë e bllokuar.
