Ditën e sotme, një tjetër protestë është paralajmëruar të mbahet në orën 18:00, si shenjë revolte ndaj vrasjes së 25-vjeçarit Klodian Rasha.
Nisur nga njoftimet në rrjetet sociale, Ministria e Brendshme ka marrë masa për të blinduar ndërtesën, pasi pritet një numër i madh protestuesish.
Përpara Ministrisë, duken disa furgonë, forca të shumta policie me kundra gaz, të cilët kanë rrethuar ndërtesën ku mendohet se do të mblidhen njerëzit.
Protesta e djeshme, u shoqërua me një konfrontim fizik mes protetuesve dhe forcave policore, si dhe zemërimi qytetar solli një sulm ndaj institucioneve më të rëndësishme në vend, si Ministria e Brendshme dhe kryeministria.
Klodian Rasha është ekzekutuar këtë të martë, 8 dhjetor, nga një efektiv policie. Ngjarja ka ndodhur në zonën e Laprakës në kryeqytet, pasi i riu kishte dalë orët e para të mëngjesit jashtë banesës së tij, duke thyer orën policore.
Policia shprehet se Rasha ka kërcënuar efektivin e policisë, ndaj ai ka qëlluar në kushtet e vetëmbrojtjes dhe në errësirë. Por, ndryshe thonë familjarët dhe fqinjët të cilët shprehen se rruga është me ndriçim dhe i riu nuk mbante asnjëherë armë me vete.
