Bledi Çuçi filloi zyrtarisht detyrën si Ministër i Brendshëm me prezantimin e anketimit të qeverisë suedeze mbi perceptimin për Policinë e Shtetit.
Çuçi u shpreh se anketimi i kryer nga qeveria suedeze, është kryer përpara ngjarjes së rëndë që ndodhi pak ditë më parë, vrasjes së Klodian Rashës nga një efektiv policie, çka shkaktoi edhe një valë protestash dhe dorëheqjen e Sandër Lleshajt.
Sipas tij, shumica dërrmuese e shqiptarëve aprovojnë punën e Policisë së Shtetit dhe shifrat e studimit.
Sa i përket sigurisë që ndjejnë qytetarët, ministri u shpreh se mesatarja e Europës është 81%, ndërsa ne jemi 80%.
“Ndjehem shumë mirë për këtë komunikim të policisë me publikun dhe ndryshim të punës së policisë nga publiku. Sondazhi vjen në një moment pak specifik, javën e kaluar kemi përjetuar një situatë pak jo të zakonshme, por që nxori në sipërfaqe atë kategori njerëzish që s’lënë pa hedhur baltë mbi punën e policisë dhe gjithë qeverisë. Rezultatet kanë dalë para atyre ngjarjeve. Tregojnë vjeshtën e 2020 se si e përcakton publiku punën e bërë nga policia”.
Po referuar sondazhit, ministri tha se Policia e Shtetit është sot shumë pak më e varur nga politika është apolitike, perceptimi mbetet një aspekt shumë i rëndësishëm me publikun. “Kemi lënë pas vende si Mbretëria e Bashkuar, Spanja apo Franca sa i përket perceptimit se sa e politizuar është Policia e Shtetit”. Jemi drejt fundit sa i përket përgjegjësisë që ne si publik kemi për të bashkëpunuar me Policinë e Shtetit. Jemi larg mesatares së BE, por prapë kemi bërë përmirësim”, tha Çuçi.
