Këshilli i Europës ka kërkuar dialogun si zgjidhje për konfliktin politik në Bjellorusi, por pas mbledhjes, kancelarja gjermane Angela Merkel ka përjashtuar mundësinë se ajo vetë mund të jetë ndërmjetëse e një dialogu.
Ditën e sotme, KE ka diskutuar në një video konferencë, situatën e krijuar në Bjellorusi pas zgjedhjeve të 9 gushtit.
Në deklaratën për shtyp, thuhet se Bashkimi Europian ka ndjekur me shqetësim zhvillimet në Bjellorusi dhe duke qenë se zgjedhjet e 9 gushtit nuk kanë qenë të lira e të ndershme, nuk do të njohë rezultatin e tyre.
Raportohet se anëtarët e Këshillit të Europës u kanë bërë thirrje autoriteteve bjelloruse të gjejnë një mënyrë për të nxjerrë vendin nga kriza, duke i dhënë fund dhunës dhe duke përfshirë dialogun kombëtar, ku duhet të marrin pjesë të gjitha partitë.
