Kryeministri Edi Rama ka bërë me dije se ditën e nesërme do të publikohen listat e bizneseve, që fillojnë punën në dy javët e ardhshme.
Në një komunikim live me qytetarët, Rama tha se rikthimi i këtyre bizneseve në punë do të bëhet në kushtet e distancimit social dhe respektimit të rregullave.
Kreu i qeverisë tha se duke filluar që nga mëngjesi i ditës së nesërme, do të publikohen kategoritë e bizneseve që do të fillojnë punën më datë 20 prill, në faqen e e-Albania.
“Së treti, javën e ardhshme, do mund të punojnë lirisht, brenda fashës së përcaktuar 5 e mëngjesit – 5.30 pasdite apo me turne, të gjithë ata që nga nesër paradite, do të lexojnë kategoritë e lejuara në faqen e e-albania.
Të gjithë administratorët, për të gjitha bizneset në të gjitha këto kategori, duhet të sigurohen që në bizneset përkatëse do të respektohet protokolli i sigurisë dhe duhet t’u lexojnë pronarëve apo punonjësve të tyre, rregullat e përcaktuara nga protokolli, si edhe pasojat penale për shkelësit e tyre. Së katërti, javën ardhshme, duhet të përgatiten pre t’u hapur në javën në vazhdim, pra duke filluar nga e hëna, 27 prill, të gjitha ato kategori të tjera që do të publikohen si blloku i dytë i hapjes, në faqen e e-albania.
Dhe së fundmi, dua të jem shume shumë i qartë, nga java e ardhshme, në bazë të Kodit të ri Penal, pasojat për shkelësit e rregullave pa përjashtim dhe në radhë të parë për lokalet e trimave të lagjeve, që hapen fshehurazi, do të jenë të rënda e të panegociueshme”, tha ai.
