Këngëtari Gëzim Nika, i ftuar në një intervistë në emisionin “Rreze Dielli”, në “Report TV”, ka rrëfyer për vuajtjet që ka përjetuar familja e tij, si pasojë e krimeve të komunizmit.
Ai është ngacmuar për procesin e hapjes së dosjeve, duke u treguar mjaft tolerant. “Nuk ka ndodhur vetëm në familjen time, por edhe në familjet më të nderuara”, ka thënë ai.
“Gjithë këtë tmerr, pse nuk doli dikush për të thënë: më fal. Kjo ishte një sëmundje që ishte komunizëm. Unë kam rreth 200 këngë në repertorin tim, por kam pasur shumë probleme. Kam qenë me biografi të keqe”, tha më tej ai.
Me gjithë kalvarin e vuajtjeve, Gëzim Nika ia ka dalë mbanë. “Babain e martoi gjyshja 16-vjeç, se ishte mashkulli i fundit. Ka pas një dynym tokë dhe kishte lëviz traktori një metër. I thanë; ti e ke lëviz me qëllim. E dënuan me 6 muaj punë trajektojëse”.
Ai risjell në kujtesë edhe vitet e vështira me karrierën e tij. Një ndër to përkon me vitin ’83, në Gjirokastër, ku 30 minuta para se të dilte në skenë, i kishin hequr këngën. Por për fat, ai ishte ngjitur në skenë. Ai vetë e pranon se në atë sistem nuk kishte vetëm spiuna, por edhe njerëz të mirë.
Ironitë nuk kanë fund, pasi rikujton edhe kohën kur në atë vit mori çmimin si këngëtari më i mirë dhe i kishin bërë dhuratë një vepër të shokut Enver. Por pasi kishin mësuar se ishte me njollë në biografi, pas pesë ditësh ia kishin kërkuar këtë dhuratë, duke i thënë: Ta kemi dhënë gabim!
