Filantropi i njohur, Bill Gates, mendon se deri në fund të vitit 2021 bota do të ketë shpëtuar nga makthi i koronavirusit.
Në një intervistë të dhënë së fundmi për Bloomberg, Gates tha se deri në fund të vitit tjetër mund të shpresohet për kthim në normalitet. Ndërsa, sa i përket gjetjes së një vaksine, miliarderi i Microsoft tha se është një çështje komplekse.
“Vaksina fillestare nuk ka për të qenë ideale në termat e efektivitetit kundër sëmundjes dhe transmetimit. Mund të mos ketë një kohëzgjatje të madhe dhe do të përdoret kryesisht në vendet e pasura. Do të ishim me fat të kemi mjaftueshëm, para fundit të vitit. Por më pas, më 2021 një numër vaksinash të tjera me shumë gjasë do të aprovohen”, tha ai.
Gates shprehet kundër faktit që vaksinat të kryhen me detyrim, pasi sipas tij ato mund të prodhojnë një efekt të kundërt. Ai shtoi se për njerëz që punojnë ku ka mosha të thyera, një gjë e tillë duhet të aplikohet.
I pyetur sesi do të përfundojë kjo situatë pandemike, Gates është i mendimit se mjekësia do të triumfojë.
“Risitë terapeutike do të ulin shkallën e vdekshmërisë, por fundi i vërtetë do të vijë nga përhapja natyrale e infeksioneve dhe vaksina që do të na japë imunitet kolektiv. Për vendet e pasura ky fund do të jetë diku nga viti që vjen, idealisht në gjysmën e parë. Ne do të dalim nga kjo situatë nga fundi i 2021-t. Ishim me fat që nuk ishte një sëmundje më fatale”, tha ai.
