Dalin të dhënat e para të raportit mbi atë që shkaktuar deri më tani moti i keq dhe përmbytjet masive në vendin tonë.
Raporti i Zyrës Operacionale të Situatës është publikuar nga kryeministri Rama, i cili shkruan se publikimi i tij mund t’u vlejë të gjithëve ju, familjarëve e të afërmve tuaj, për t’u njohur me situatën dhe pritshmëritë lidhur me zhvillimet e mëtejshme të saj.
Siç duket në slajdet e publikuara nga raporti, në qarkun e Kukësit dhe të Shkodrës niveli i rrezikut është i ulët, në Dibër i moderuar, ndërsa në të gjitha qarqet e tjera rreziku shfaqet i lartë.
Po ashtu, deri në orën 12:00, nga raporti rezulton se:
- Një punonjës i OSHEE në Fier ka humbur jetën
- 3 persona janë plagosur rëndë në Shkodër
- 69 familje janë evakuar, mes tyre një në Has, 7 në Dibër, 19 në Durrës, 22 në Tiranë, 9 në Berat, 4 në Vlorë dhe 7 familje rome në Gjirokastër.
- 125 persona janë shpëtuar.
Për sa i përket situatës në rrugët e qarqeve, ajo rezulton e tillë:
- Është shembur Ura e Drojes në Fushë-Krujë-Mamurras, është bllokuar aksi Fushë-Krujë-Laç, Vorë-Tiranë
- Përmbytet autostrada Tiranë-Durrës, bllokohet Durrës-Kavajë, shembet ura e Pajanit në Pezë dhe ajo e Mumlit në Kavajë.
- Bllokohet rruga Gjirokastër-Lunxhëri, po shemben muret anësore të urës së Viroit dhe është bllokuar kalimi.
- Ka rrëshqitje dherash në segmentin Berat-Poliçan
- Është prishur ura e Drohës në Kurbin, aksi Lurë-Kurbnesh-Rrëshen është i bllokuar.
- Bllokohet aksi Klos-Qafë Buall, Ura e Kishavecit
- Bllokohen 1500 banorë në fshatin Vukel, pas dëmtimit të urës së Suhes në Shkodër.
Për sa i përket energjisë elektrike, situata shfaqet mjaft e rënduar, teksa aktualisht numërohen rreth 127.000 abonentë pa energji elektrike, mes të cilëve situata shfaqet më problematike në Shkodër, Durrës, Tiranë, Fier, Berat, Vlorë dhe Gjirokastër, ku shënohet numri më i madh i abonentëve pa energji elektrike.
