Kosova ka regjistruar një rritje të numrit të viktimave nga koronavirusi në bilancin e fundit.
Gjatë 24 orëve, në vendin fqinj janë shënuar 14 viktima, në krahasim me 12 që u shënuan një ditë më parë.
Kështu shkon në 341 numri total i personave që kanë humbur jetën nga COVID-19 në Kosovë, që prej shpërthimit të pandemisë.
Ndërkohë, sa i përket rasteve të reja, është evidentuar një ulje gjatë 24 orëve të fundit. IKSHPK raporton se janë regjistruar 172 raste të reja pozitive, ndërsa një ditë më parë u shënuan 188.
Deri më tani në Kosovë janë shënuar mbi 10 mijë raste pozitive me COVID-19, prej të cilave 4,020 raste janë ende aktive.
Deklarata e plotë:
114 TË SHËRUAR DHE 172 RASTE ME COVID-19!
Gjatë 24 orëve të fundit, në Laboratorin e Mikrobiologjisë Molekulare në IKShPK me metodën RT-PCR, janë testuar gjithsej 506 mostra të marra nga ShSKUK dhe gjurmimi i kontakteve të rasteve në terren prej të cilëve rezultojnë 172 raste pozitive. Brenda 24 orëve janë raportuar 14 raste të vdekjes me SARS CoV-2 pozitiv.
Numri total i rasteve pozitive është 10.419 raste nga 41.152 persona të dyshimtë në virusin SARS-CoV-2 dhe 341 raste të vdekjes.
Gjatë 24 orëve të fundit, janë shëruar 114 pacientë derisa numri i përgjithshëm i të shëruarve deri më sot është gjithsej 6.058 raste, kurse numri i rasteve aktive është 4.020.
Rastet pozitive janë nga: komuna Prishtinë 78 raste, komuna Gjilan 19 raste, komuna Mitrovicë 15 raste, komuna Fushë Kosovë 9 raste, komuna Pejë 8 raste, komuna Viti 7 raste, komuna Skenderaj 6 raste, komuna Drenas 5 raste, komuna Obiliq 5 raste, komuna Vushtrri 4 raste, komuna Kamenicë 3 raste, komuna Lipjan 3 raste, komuna Podujevë 2 raste, komuna Rahovec 2 raste dhe me nga një rast komunat Ferizaj, Gjakovë, Istog, Klinë, Prizren dhe Shtime.
