812 persona kanë ndërruar jetë nga koronavirusi në Itali, brenda 24 orëve të fundit.
Kështu numri total i vdekjeve të shënuara nga virusi Covid-19 ka shkuar në 11,591. Ndërkohë numri i përgjithshëm i rasteve të regjistruara nga koronavirusi në shtetin fqinj ka shkuar në 101,739.
Nga këto: 75,528 raste janë ende aktive, ndërsa 14,620 janë shëruar nga virusi vdekjeprurës. Vetëm në 24 orët e fundit janë shëruar 1,590 persona, ndërsa janë shtuar 1,648 raste të reja.
Italia është vendi që regjistron numrin më të madh të viktimave nga virusi Covid-19. Ndërsa mban vendin e dytë pas SHBA-ve, si vendi me numrin më të madh të personave të infektuar nga koronavirusi.
Prej ditësh tashmë edhe Spanja po regjistron shifra të frikshme, thuajse të njëjta me ato të shtetit italian. Spanja është vendi i dytë në botë që shënon numrin më të madh të viktimave.
