Situata nga koronavirusi në Belgjikë vijon të rëndohet dita ditës, teksa vendi tashmë renditet si një ndër shtetet me më shumë viktima në botë.
Edhe pse ka një rënie të numrit të vdekjeve në krahasim ditët e mëparshme, prapë numri vijon të mbetet i lartë.
Në 24 orët e fundit në Belgjikë janë shënuar 177 viktima, 61 më pak se ditën e djeshme ku u regjistruan 238 vdekje. Ndërkohë janë regjistrua edhe 809 raste të reja, duke e çuar në 46,134 numrin total të personave të infektuar.
Me 7,094 viktima, Belgjika renditet e gjashta në botë për numrin më të madh të vdekjeve nga COVID-19, pas SHBA-ve, Italisë, Spanjës, Francës dhe Mbretërisë së Bashkuar.
Belgjika shënon edhe më shumë viktima se Gjermania, e cila është një ndër 5 shtetet më numrin më të madh të rasteve të infektimit. Me mbi 157 mijë raste infektimi, Gjermani regjistron vetëm 5,884 viktima.
Më shumë se 2,9 milionë njerëz janë prekur nga koronavirusi, ndërsa mbi 205 mijë persona kanë humbur jetën.
