Një i vrarë dhe një i plagosur është bilanci i rëndë i shënuar në Durrës, gjatë mbrëmjes së djeshme. Uniformat blu raportojnë se shtetasi Edison Harizaj, 39-vjeç, ka mbetur i vrarë në atentatin me armë zjarri, ndërsa shtetasi Geci Caci, 33 vjeç, po nga qyteti i Vlorës ka mbetur i plagosur.
Sipas burimeve mësohet se mbi trupin e 39-vjeçarit E.H është derdhur një karikator plumbash, që ka sjellë vdekjen e menjëhershme të tij, ndërkohë që i plagosuri G.C., 33-vjeç nga Vlora ndodhet në gjendje të rëndë shëndetësore.
Dyshohet se ndaj tyre te jetë bërë një atentat tipik mafioz. Në varrezat e Shën Vlashit është gjetur një makinë e braktisur dhe e djegur, për të cilën policia ka dyshime se është përdorur nga autorët.
Njoftimi i policisë:
Më datë 06.11.2018 , rreth orës 22:50 ,në lagjen nr. 13, Durrës, brenda një mjeti tip “Audi” është gjetur pa shenja jete shtetasi E.H. 39-vjeç, banues në Vlorë dhe i plagosur shtetasi G.C. 33-vjeç, banues në Vlorë, i cili ndodhet në Spitalin Rajonal Durrës, nën kujdesin e mjekëve.
Grupi hetimor vijon punën për identifikimin, dhe kapjen e autorëve, si dhe sqarimin e rrethanave të ngjarjes.
