Teksa shtete të tjera si Spanja dhe Italia kanë shënuar një ulje të ndjeshme të numrit të viktimave, situata në Mbretërinë e Bashkuar vijon të mbetet e rëndë.
Edhe pse sot ka shënuar një rënie në krahasim me ditën e djeshme, bilanci vijon të mbetet një ndër më të rëndët të shënuar brenda 24 orëve.
Sipas mediave britanike, në 24 orët e fundit janë shënuar 638 viktima, 125 më pak se ditën e djeshme ku u regjistruan 763 persona të vdekur.
Ndërkohë vijon të jetë në rritje numri i rasteve të reja. Në 24 orët e fundit janë shënuar 4,583 raste të reja infektimi, duke e çuar në 138,078 numrin total të personave të infektuar.
Vendi më i prekur në Britani vijon të mbetet Londra, ku shënohet edhe numri më i madh i viktimave. Me mbi 18 mijë viktima nga COVID-19, Mbretëria e Bashkuar renditet e pesta me numrin më të madh të vdekjeve, pas SHBA-ve (47,808), Italisë (25,085), Spanjës (22,157) dhe Francës (21,340).
Më shumë se 2,6 milionë njerëz nga e gjithë bota janë prekur nga virusi vdekjeprurës, ndërsa mbi 186 mijë persona kanë humbur jetën.
