Një sasi eksplozivi i është vendosur makinës së drejtorit të Hekurudhave në Durrës, Ani Dyrmishi. Sipas informacioneve mjeti i Dyrmishit ndodhej i parkuar në lagjen ku ai banon, në Durrës. Në një prononcim për mediat Dyrmishi është shprehur se nuk e kishte vënë re lëndën plasëse. Ai ka rrëfyer se është njoftuar nga fqinjët pasi është larguar me mjetin nga vendngjarja.
“Nuk kam konflikte me askënd. Bidoni ishte në tokë nuk e di nëse ishte vënë për mua. Për lëndën plasëse më lajmëruan fqinjët. Fqinjët kishin parë një bidon të zi poshtë makinës sime”, është shprehur ai.
Banorët e zonës kanë qenë ata të cilët i kanë vënë re objektin e menjëherë më pas kanë njoftuar policinë. Ata kishin njoftuar blutë për vend ishte parkuar makina e Dyrmishit. Ky i fundit, i cili në atë çast ndodhej në hyrje të Tiranës, është njoftuar për ngjarjen përmes një telefonate nga fqinjët.
Përpara se të vendosej në dhjetor të 2017-s në postin e drejtorit të Hekurudhave, Ani Dyrmishi ishte ish-drejtori i Hipotekës në Durrës. Në një listë të kryeministrit Edi Rama në korrik të 2017-s, Dyrmishi rezultonte midis 100 zyrtarëve më të korruptuar. Lista “e zezë” përmbante kryesisht emrat për të cilët qytetarët ankoheshin vazhdimisht. Megjithatë, deputetët socialistë më datë 18 korrik të këtij viti i dolën në krah Dyrmishit, duke argumentuar se duhet bërë kujdes në referimin e informacioneve./TIRANA TODAY/
