Një sulm rus në Ukrainë është “ende një mundësi” dhe kostoja njerëzore do të ishte “i madh”, ka thënë presidenti amerikan Joe Biden.
Në komentet e transmetuara në televizionin kombëtar, ai tha se SHBA ishte gati t’i përgjigjej me vendosmëri një lëvizjeje të tillë. Z. Biden tha se Rusia kishte grumbulluar rreth 150.000 trupa në kufijtë e Ukrainës.
Rusia thotë se po tërheq disa nga trupat e saj. Të mërkurën njoftoi se stërvitjet ushtarake në Krimenë e aneksuar nga Moska, kishin përfunduar.
“Njësitë e Qarkut Ushtarak Jugor, pasi kanë përfunduar pjesëmarrjen e tyre në stërvitjet taktike, po lëvizin në pikat e tyre të përhershme të vendosjes”, tha Ministria e Mbrojtjes në një deklaratë, pa dhënë detaje se sa trupa po largoheshin.
Pamjet e transmetuara në televizionin shtetëror, dukeshin se tregonin automjete ushtarake që kalonin urën për t’u larguar nga Krimea.
Por udhëheqësit perëndimorë mbeten të kujdesshëm, me z. Biden që tha të martën se ndërsa largimi i forcave ruse “do të ishte mirë”, ende nuk ishte verifikuar.
“Në të vërtetë, analistët tanë tregojnë se ata mbeten shumë në një pozicion kërcënues”, tha ai.
Të martën, Ukraina tha se faqet e internetit të Ministrisë së saj të Mbrojtjes dhe dy bankave u vunë nën një sulm kibernetik. Shkaku nuk është i qartë, por Ukraina ka pësuar sulme në shkallë të gjerë më parë në infrastrukturën e saj online, dhe ka drejtuar gishtin nga Rusia.
Prej kohësh ekziston shqetësimi se në vend të një pushtimi në shkallë të plotë, Rusia mund të përdorë mjete më pak të dukshme për të destabilizuar Ukrainën, për shembull përmes sulmeve kibernetike në infrastrukturën kritike. Presidenti Biden tha të martën se Shtetet e Bashkuara ishin të përgatitura, për t’iu përgjigjur çdo lëvizje të tillë.
Fjalimi i Biden erdhi disa orë pasi presidenti rus Vladimir Putin tha se shqetësimet e Moskës për sigurinë, duhet të trajtohen dhe të merren seriozisht.
Putin gjithmonë ka mohuar planifikimin e një inkursioni dhe tha se Rusia nuk dëshiron një luftë tjetër në Evropë. Megjithatë, tensionet janë rritur që nga nëntori.
Pas raportimeve të mëparshme se inteligjenca amerikane besonte se Rusia mund të sulmonte Ukrainën të mërkurën, presidenti ukrainas Volodymyr Zelensky e shpalli atë si një ditë uniteti, duke u bërë thirrje qytetarëve të valëvisnin flamurin e vendit dhe të vishnin shirita blu dhe të verdhë – ngjyrat kombëtare të Ukrainës.
Burimi i lajmit: BBC. Përshtatur nga Tirana Today
