Gjykata e Krimeve të Rënda ka shtyrë seancën për ish-ministrin e Brendshëm, Saimir Tahiri. Mësohet se seanca e radhës ku dhe do të merret një vendim për Tahirin, do të zhvillohet në datën 19 shtator. Ai tha në një prononcim për mediat se Prokuroria e kishte shumë të thjeshtë që të verifikonte gënjeshtrat. Sipas tij, akuzat janë pa prova dhe të stisura nga Prokuroria.
“Kam pasur shpresën që një ditë e vërteta është kollaj të dalë në dritë. Dëgjuat në sallë gjithë argumentimin tim dhe të Maksit, për sa gënjeshtra janë thënë gjithë kësaj kohe.
Ishin shumë të kollajshme për t’u verifikuar nga Prokuroria. Jam akuzuar si pjesë e një grupi të strukturuar kriminal, bashkë me disa policë, të cilët për kohën kur akuzohen, nuk kanë qenë në detyrë.
Ky procedim penal është nisur nga policët që kanë qenë në varësinë time, dhe që sot janë të akuzuar bashkë me mua. Ato prova të paraqitura nga Prokuroria janë të gënjeshtërta, dhe këtë gjë nuk ka nevojë ta them unë. Këtë e thotë edhe drejtësia italiane”.
Saimir Tahiri shtoi se ka lënë mandatin e deputetit, që të përballet me drejtësinë si qytetar i thjeshtë.
“Ju e dëgjuat dhe unë jo pa shkak kam ndenjur në heshtje këto 2 vjet. Kam dashur të respektoj drejtësinë deri në fund. Jo pa shkak kam dhënë dorëheqje nga mandati i deputetit, që të përballem me drejtësinë si qytetar. Kam refuzuar që të përgjigjem ndaj akuzave të Prokurorisë, duke mbajtur gjithë baltën në kurriz, duke shpresuar se e vërteta do dalë në dritë”, tha Tahiri.
