Duket se do të ketë një “luftë” të fortë mes Shqipërisë dhe Kosovës sa i përket talentit të Bayern Munich, Meritan Shabanit. Ai ka luajtur me kombëtaren e moshave të Gjermanisë, por tashmë interes të lartë për të marrë shërbimet e mesfushorit ka treguar Panucci dhe Challandes.
Trajneri i kombëtares shqiptare në një konferencë për shtyp pak ditë më parë është shprehur se ai ka kontaktuar me familjarët e tij, por përgjigja ka qenë se nuk ka vendosur akoma. Por nga ana tjetër trajneri zviceran i Kosovës është shprehur optimist se talenti i Bayernit do të bashkohet me përfaqësuesen që drejton ai.
“Kam takuar familjarët e Shabanit dhe më kanë konfirmuar se lojtari do të luajë për Kosovën. Ky është vendimi i tyre. Bëhet fjalë për një futbollist të ri, me një të ardhme të ndritur, ndaj presim që të vijë dita të debutojë me Kosovën”, deklaroi Challandes.
