Kryetari i PD-së, Sali Berisha ka paralajmëruar më herët një protestë kombëtare në datën 7 korrik. Ai ka lajmëruar se më 7 korrik PD-ja do të organizojë protestën e parë kombëtare. Madje gjatë një takimi me shoqërinë civile, Berisha tha se është menduar që të quhet fronti për shpëtimin e Shqipërisë, dhe do të pasohet nga protesta të tjera. Në një konferencë me gazetarët gjatë mesditës së sotme, ai u shpreh se është i gatshëm që ta udhëheqë, por edhe të udhëhiqet nga kjo protestë.
“Të vërtetat janë protestat, duhet të jetë e atillë që nuk duhet të ndalet gjer në realizimin e qëllimit. Por cila do jetë kjo protestë që nuk do ndalet? Do e përcaktojë vetë protesta!
Mos harroni një parim: në lëvizje ky është një front, fronti për shpëtimin e Shqipërisë. Në një lëvizje suksesi përcaktohet kur ti pranon që njëherë udhëheq ti, njëherë të udhëheqin. Mund të të duket çudi, por vetëm në këtë mënyrë arrihet te suksesi. Unë jam i gatshëm edhe të udhëheq edhe të më udhëheqin”, u shpreh Berisha.
Berisha është pyetur se cili do të jetë qëllimi i protestës së thirrur më 7 korrik, nëse mes skenarëve është dhe hyrja në Kryeministri. Ai tha se qëllimi për këtë protestë është ngritja e shqiptarëve në këmbë, kundër këtij regjimi.
“Qëllimi i protestës është që të ngrihen shqiptarët në këmbë kundër këtij regjimi armiqësor, kundër kësaj qeverie që është kundër shqiptareve. T’i ngre shqiptarët në këmbë kundër një regjimi, që ka futur dorën në xhepat e shqiptarëve. Ju e dëgjuat të dhënat e fundit në Parlament që bëra unë. Të dhënat e INSTAT tregojnë se çmimi i bukës dhe i qumështit është rritur, 7 herë më shumë. Vaj dhe yndyrat kushtojnë 106 % më shumë se mesataren e BE. Inflacioni është gënjeshtër ajo që thuhet”, tha Berisha.
