Diplomati amerikan Richard Grenell ka zgjedhur që të mos komentojë vendimin e Departamentit Amerikan të Shtetit, për të shpallur non-grata ish-kryeministrin Sali Berisha.
I pyetur për vendimin e DASH dhe për deklaratën e Berishës për ndikimin e Geoge Soros apo kryeministrit Rama tek Departamenti i Shtetit, Grenell u rezervua në komente.
“Shiko, këto janë vendime të administratës së tanishme, dhe nuk do i komentoj”, tha Grenell në një intervistë për “News 24”.
Pavarësisht deklaratës së fortë të ambasadores Yuri Kim, se SHBA nuk e duan Berishën e shpallur non grata në parlament në muajin shtator, nga ana tjetër, ish-kryeministri vijon ‘rezistencën’ e tij.
Jo më larg se një ditë më parë , ish-kreu i PD-së ia ka kujtuar të gjithë demokratëve një ‘premtim’ që ai i pati bërë më parë. Premtimin se do mbetet njëri prej tyre, edhe sikur në PD të mbetet vetëm një anëtar.
Pak më herët, diplomatja amerikane në Tiranë i ka kërkuar Lulzim Bashës që të distancohet nga Sali Berisha.
“Një parti nuk mund të ‘hajë bar’ për hir të një deputeti”, tha sot Kim, referuar shprehjes së thënë në komunizëm “edhe bar do hamë dhe nuk do i përkulemi armikut”, ka thënë ajo.
Ish-kryeministri Sali Berisha u shpall non-grata nga Departamenti Amerikan i Shtetit, bashkë me familjen e tij. Vetë Berisha e ka konsideruar të pa bazë këtë vendim, duke kërkuar që SHBA të bëjnë publike çdo provë që kanë kundër tij. Ai ka paditur Antony Blinken, Sekretarin Amerikan të Shtetit.
