Ish-kryeministri Sali Berisha ka vënë dje në zbatim planin B, për të katapultuar në politikë Astrit Patozin. Vetë kryeministri Rama e tha pak ditë më parë se futja e Patozit në zgjedhje është strategji e Berishës. Dje janë dhënë sinjale të qarta se ish-kryeministri po luan me dy porta; nga njëra anë po përdor Bashën për të nxitur destabilitet dhe për të rrëzuar Shqipërinë, por nga ana tjetër po përdor kreun e Bindjes Demokratike për të rivalizuar PS në zgjedhje.
Edhe pse pritej që Patozi më shumë të fokusohej te këshillat bashkiakë, dje ai ka bërë të ditur se do të dalë me kandidatë për kryetar në 61 bashkitë e vendit. Kjo tregon qartë se ai ka nisur tentativat për të krijuar një opozitë të re në pushtetin vendor. Po ashtu kjo tregon se Berisha nuk do që PS të triumfojë në bastionet e djathta.
Ditën e djeshme, përmes një deklarate për media, Patozi e bëri të qartë se Bindja Demokratike do të bëjë një betejë frontale duke u përballur me të gjithë kandidatët e mazhorancës dhe në çdo bashki do të ketë kandidatë. Ai deklaroi se përmes partisë së tij do të mbështesë të gjithë kandidatët e pavarur në bashkitë e bastionit të djathtë.
“Bindja Demokratike është e vendosur që në zgjedhjet e 30 qershorit të bëjë betejën e saj frontale në të gjithë territorin e vendit, duke u përballur me të gjithë kandidatët të PS, pa asnjë dallim. Në këtë sfidë të vështirë ne do të kërkojmë mbështetjen e çdo qytetari, që e refuzon këtë mazhorancë dhe mendon se Shqipëria po qeveriset keq, për shkak të qeverisë të korruptuar. Kjo do të thotë se BD ka objektivin e vet kryesor që në këto zgjedhje të përfaqësohet nga kandidatët e saj në çdo bashki të Shqipërisë. Nga ky rregull i përgjithshëm do të përjashtohen vetëm këto dy raste: kandidatët e pavarur dhe ish-kryetarët e bashkive të djathta. Ne shprehim vlerësimin tonë për çdo kandidat të pavarur, që është regjistruar në zgjedhje si kundërshtar i qeverisë, duke i konsideruar cilindo prej tyre si aleatin tonë të natyrshëm për një kauzë të përbashkët”, deklaroi ai. “Arsyeja është një dhe e vetme, që votat e kundërshtarëve të qeverisë të mos çahen dhe që ne të arrijmë qëllimin e përbashkët, fitoren tonë ndaj çdo përfaqësuesi të “Rilindjes”.
Ne angazhohemi gjithashtu se do të mbështesim dhe nuk do të rivalizojmë edhe kandidatë të mundshëm nga radhët e kryetarëve të bashkive të djathta, të cilët mund të vendosin të kandidojnë në të ardhmen përballë përfaqësuesve të qeverisë. Ne do të konsiderojmë ata njësoj si përfaqësuesit tanë, sepse mendojmë që vetëm bashkimi i çdo force opozitare mund të sjellë një rezultat fitues përballë kandidatëve të Partisë Socialiste”, deklaroi ai./Gazeta SOT
