Ish-kryeministri Berisha po mban një fjalim në Çadrën e Lirisë, ku ka falendëruar popullin e Kavajës, pasi sipas tij, i dha një mësim të mirë Ramës.
Gjithashtu, Berisha bën thirrje që të gjithë shqiptarët të vijnë për të protestuar më 13 maj në Tiranë, si dhe u bën thirrje banorëve të kryeqytetit që të hapin dyert e shtëpive për protestuesit që vijnë nga mbarë Shqipëria.
“Me qëndresën tuaj e ndryshuat Shqipërinë. Le t’u dërgojmë një përshëndetje vëllazërore burrave dhe grave, djemve dhe vajzave të Kavajës. Kavaja me një mesazh të jashtëzakonshëm, i tha Ramës që data 7 në Kavajë do të jetë fundit yt. Kavaja i tha Ramës se në 7 do të japim ty atë mësim që i dhamë Ramiz Alisë në 1991.
Kavaja i tha Edi Ramës mjerë ata që mendojnë t’i bëjnë varrin pluralizmit, sepse dështimi i pret. Një mirënjohje të madhe për Kavajën që e bën Edi Ramën të kapitullojë në panik të madh, të tërhiqet. Kjo fitore e jashtëzakonshme e çadrës së lirisë, e të gjithë qytetarëve shqiptarë që duan votën e lirë është gjithashtu një frymëzim për mbarë shqiptarët, të shndërrojnë 13 majin në ditën e largimit, në ditën e triumfit, në ditën e protestës më të fuqishme, më madhështore, më civile në historinë e protestave më Shqipëri.
Më 13 maj drejt Tiranës do të vërshojnë dhe u bëj thirrje qytetarëve të Tiranës të hapin dyert për të gjithë qytetarët që do vijnë në protestë.
Rama ka urdhëruar të rinjtë e Shqipërisë të organizojnë pikniqe që të mos vijnë në protestë. Këtu i ke! Sepse ti ua mbushe shkollat me drogë, ti po i përzë ata nga vendi i tyre. Ti iu mbylle të varfërve të këtij vendi dyert e universiteteve, të vetmet vende pune që ke krijuar janë plantacionet e kanabisit.”
