Sali Berisha e ka përsëritur edhe një herë mbrëmjen e djeshme, se nëse del qoftë edhe një fakt nga akuzat që SHBA ka bërë për shpalljen “non grata”, do të largohet nga politika. Këtë pohoi kryetari i Partisë Demokratike, Sali Berisha, në një takim të hapur me intelektualë, në lidhje me shpalljen e tij “non grata” nga SHBA-ja. Berisha ka komentuar sërish shpalljen “non grata” nga Mbretëria e Bashkuar dhe SHBA-ja, duke hedhur akuza se pas tyre fshihet George Soros. Në takimin me intelektualë, u zotua se nëse vjen PD-ja në pushtet, njeriu i parë që do të shpallë “non grata” është George Soros dhe djali i tij.
“Shtrohet një problem tjetër, Soros, “non-grata”… me 20 maj të 2021 në një sallë unë kam deklaruar, s’kisha menduar se do detyrohesha të sfidojë Sekretarin e Shteteve të Bashkuara, por meqë kishte firmosur një akt që unë kisha bindjen absolute se nuk qëndronte asnjë fakt. I thash paraqit fakte se ndryshe do shkoj në Gjykatë se s’ke dhe s’do gjesh kurrë ndonjë fakt për mua dhe fëmijët e mi. Unë kam qenë i këtij kodi dhe sot pas 15 muajsh me gjithë check-up universal, kanë gjet zero, megjithatë vazhdoj të them një fakt të vetëm po sollët i them mirupafshim politikës.
Kjo që ndodh me drogën në Shqipëri, është politikë e tij. Sepse padroni i Ramës ka nisma në organizatën në Kombet e Bashkuara për të ndërprerë transportin e drogës… mirëpo ku është droga? Por ai e predikon, kjo qe arsyeja që në 2017 kërkova shpalljen tij “non-grata” dhe nëse PD-ja vjen në pushtet, njeriu i parë që do shpallet “non-grata” do jetë Soros dhe i biri”, tha Berisha.
Sikundër Meta, Berisha bëri thirrje për referendum. Në mbledhjen në atë që e quan “Fronti për shpëtimin e Shqipërisë” për të folur rreth situatës ku ndodhet vendi, theksoi se është e rëndësishme që të punohet me demokracinë dhe të bëhen ndryshimet që duhen.
“Të gjithë ne duhet të përgatitemi për një referendum. Se një parti fiton zgjedhjet, një kryeministër hipën në timon, Kushtetuta mbetet siç është. Ligjet mbeten siç janë, dhe vjen tjetri që bën këto që po bën. Ka një rëndësi të jashtëzakonshme themelore të angazhohemi dhe të punojmë që me demokracinë direkte ne të bëjmë ndryshimet që duhen”, u shpreh Berisha.
