Kreu i Partisë Demokratike, Sali Berisha, i është drejtuar të gjithë ndjekësve në Tik Tok se sot është festa e gjithë shqiptarëve, por sipas tij, ky regjim po përzë rininë. Ai ka reaguar në TikTok, aty ku ka edhe ndjekësit më të rinj për të përçuar disa mesazhe me rastin e 110-vjetorit të Pavarësisë. Ditën e Pavarësisë, krydemokrati u bën thirrje të rinjve që që të marrin përgjegjësi, që Shqipëria të shndërrohet në shtëpinë e së ardhmes tonë.
SALI BERISHA NË TIKTOK
“Të dashur miqtë e mi të Tik Tok-ut,
Me këtë mesazh dëshiroj t’ju uroj nga zemra Gëzuar Ditën e Flamurit! Ditën e Pavarësisë së Shqipërisë!
Të shpreh nderimin tim më të thellë, për Ismail Qemalin dhe për të gjithë ata burra dhe gra që sakrifikuan me jetë, me penë dhe me të gjitha format bënë të mundur pavarësinë e këtij vendi.
Pavarësia e Shqipërisë është si të thuash festa e të gjitha festave të shqiptarëve. Pa pavarësinë e Shqipërisë, ne do të ishim vidhisur në honet apo mjegullnajat e Ballkanit.
Lavdi Zotit, sot ne jemi të lirë!
Në Shqipëri, në Kosovë dhe kudo që ndodhemi.
Por sot, ne kemi një problem shumë të madh, këtë regjim i cili, me politikat që ndjek, me antireformat që realizon, me plaçkitjen që i bën pasurisë kombëtare dhe fondeve publike, po përze shqiptarët!
Po përze rininë e kombit, sa asnjë regjim tjetër në histori.
Ndaj dhe kjo ditë është një thirrje për çdo të ri të këtij vendi, për çdo shqiptar të marrë përgjegjësitë e tij në mënyrë që Shqipërinë, këtë tokë të begatë, këtë vend të bekuar ta shndërrojmë në kopshtin më të bukur të ëndrrave tona në shtëpinë e së ardhmes sonë.
Zoti e bekoftë Shqipërinë!
Zoti ju bekoftë ju! Faleminderit shumë!”.
