Kryetari i Partisë Demokratike, Sali Berisha, thotë se mbledhjet e grupit parlamentar të PD-së që drejtohen nga Enkelejd Alibeaj, nuk kanë kuorumin e nevojshëm. Berisha e quajti Alibeajn një “sharlatan”, që sipas tij, keqpërdoret nga kryeministri Edi Rama.
“Një grup i vogël ndër ta ish-kryetari dhe 2-3, ky Alibeaj dhe të tjerë, të kapur këmbë, krye dhe xhep nga qeveria thonë se kjo gjë nuk ka ndodhur. Kjo lojë dështoi në mënyrë përfundimtare, se ishte përpjekje e tmerrshme për të kapur pluralizmin. Apo të kemi pluralizëm që e komandojmë si me sustë. Dje tha këtu në mbledhje kam 21 deputetë.
Dje në mbledhje ishin 4 deputetë që s’i përkisnin grupit parlamentar të Partisë Demokratike. Për të patur kuorum, mbledhja e tij duhet të kishte të paktën 27 deputetë. Por atij kur i intereson, thotë e kam me 40 grupin. Një sharlatan që ka mungesë totale respekti për veten e tij, keqpërdoret në mënyrë ekstreme nga Edi Rama. Harron se ka patur funksione të rëndësishme dhe në qeveri dhe kur bën akte të tilla vetëm sa shkelmon mbi veten e tij”, tha Sali Berisha.
Dje, kreu i Grupit Parlamentar të PD-së u shpreh se opozita është e gatshme të zbatojë marrëveshjen e arritur me PS-në, deri në sekondat e fundit të skadimit të kësaj marrëveshje. Ai hodhi akuza se ishte mazhoranca që u tërhoq nga marrëveshja, pasi në PD filluan të qarkullojnë emrat e parë.
Në datën 30 maj do të mbahet raundi i tretë për zgjedhjen e Presidentit të ri. Raundi i parë dhe i dytë dështoi për nxjerrjen e një emri nga radhët e opozitës, sakaq Konferenca e Kryetarëve sërish nuk prodhoi konsensus mes palëve.
