Ish-kryeministri Sali Berisha tha sonte se qeveria Rama nuk mund të rrëzohet me pambuk dhe lule. I ftuar në emisionin “Byro Politike”, Berisha deklaroi se opozita do të vijojë protestën deri në rrëzimin e qeverisë. Lideri historik i PD-së shpjegoi se qeverisë duhet t’i tundësh këmbët me mjete demokratike që të rrëzohet.
“Opozita do vijojë protestën deri në rrëzimin e qeverisë. Me pambuk dhe lule qeveria nuk ikën kurrë, qeverisë t’i tundësh këmbët me mjete demokratike“, deklaroi Berisha.
Ish-kryeministri tha se duhet shmangur gjakderdhja në rrëzimin e qeverisë por theksoi se duhet të rrëzohet me çdo kusht sepse rrugëdalje me votë nuk ka.
“Liderët nuk janë e njëjta prerje, por edhe qytetarët duhet të marrin përgjegjësinë që këtu rrugëdalje me votë nuk ka, të shmangim gjakderdhjen, por të rrëzojmë qeverinë“, tha Berisha.
Gjithashtu, Berisha, i tërhoqi vëmendjen indirekt kryetarit të PD-së Lulzim Basha kur tha se “Partia Demokratike nuk u ngrit në shkallën e duhur gjatë mandatit të Edi Ramës. Kam shprehur të gjitha mendimet e mia. Nuk ka kurrë fitore dhe humbje të përjetshme.”
