Pasi mori fjalën për procedurë në Kuvend, kryetari i Partisë Demokratike, Sali Berisha, ka bërë tre pyetje për zv.kryeministren Belinda Balluku. Një ndër to ka qenë edhe se çfarë lidhet me Ballukun largimi i ish-drejtorit të Përgjithshëm të Policisë së Shtetit, Gledis Nano.
“Unë jam këtu për të shtruar tre pyetje: A mundet një njeri ta mbajë me mashtrime Parlamentin 20 minuta, duke shkelur çdo rregullore siç bën zonja?
E dyta, me çfarë lidhet me ju, largimi i Nanos (ish-kryepolici Gledis Nano), drejtorit të Përgjithshëm të Policisë së Shtetit? Pastaj, fol këtu për misterin e pallatit të Lul Morinës. Na fol pak për mullar-pallatin. Pallati 8-katësh dhe ti flet për mister”, u shpreh Berisha.
Më tej kryeparlamentarja Lindita Nikolla i ndërpreu fjalën, duke pretenduar se nuk ishte procedurë.
Kujtojmë këtu se shkarkimin e Gledis Nanos nga detyra e komunikoi Ministri i Brendshëm, Bledi Çuçi, pas mbledhjes se qeverisë. Sipas Ministrit të Brendshëm, shkarkimi vinte për mospërmbushje të objektivave të caktuara. Gledis Nano është i pari drejtor i Përgjithshëm i Policisë së Shtetit gjatë qeverisjes së socialistëve që shkarkohet me motivacionin e mospërmbushjes së detyrës.
