Ditën e sotme të gjithë maturantët në mbarë vendin i janë nënshtruar provimit të parë, atij të anglishtes. Provimi ka nisur në orën 10:00 dhe në orën 12:30 ka përfunduar. Ndërkohë lidhur me provimin në fjalë ish-kryeministri Sali Berisha ka publikuar një mesazh të dërguar nga një qytetar digjital.
Në të thuhet ndër të tjera se drejtoresha e gjimnazit “Havzi Nela” në Kukës, Vjollca Gashi, që është anëtare e kryesisë së PS-së ka shpërndarë tezën e provimit në shkëmbim të votave.
“Lexoni mesazhin dhe shikoni fotot e nxënësit digjital. Përshëndetje Dok Berisha. Sot është provimi i parë i maturës në Kukës, gjuha angleze, dhe drejtoresha e gjimnazit Havzi Nela, Vjollca Gashi anëtare e kryesisë së PS-së, vegël e Safet Gicit dhe drejtorit të drejtorisë arsimore Skënder Ahmeti, po shpërndajnë tezën e provimit në shkëmbim të votave, për fëmijët e nënës parti”, thuhet në postimin e Berishës.
Kujtojmë se ditën e sotme plot 36,134 maturantë janë paraqitur për të dhënë provimin e gjuhës së huaj, ndërsa 5 ditë më vonë ata do t’i nënshtrohen testit të gjuhës shqipe e letërsisë.
