Pas takimeve të zhvilluara me banorët në jug të Shqipërisë, kryetari i Partisë Demokratike, Sali Berisha, ka dalë në një deklaratë për mediat, duke thënë ndër të tjera se do të ngrenë një grup hetimi për mënyrën se si policia ka vepruar në Lazarat. Berisha ka paralajmëruar kryeministrin Rama se do të marrë ndëshkimin e merituar për secilin prej tyre. Duke qëndruar në të njëjtën linjë, ai tha se Edi Rama dhe Saimir Tahiri kanë kryer krime kundër njerëzimit me operacionin e tyre anti-drogë.
“Do ngremë grupe hetimi për çfarë ka ndodhur në Lazarat nga policia, dhe i them Edi Ramës se do marrë ndëshkimin e merituar për secilin prej tyre”, tha Berisha.
“Unë u ktheva më i impresionuar se kurrë në 30 vite nga një vizitë, nga vizita ime në Lazarat. Çfarë konstatova aty? Te bisedimet e shkurtra, konstatova se Edi Rama dhe Saimir Tahiri kanë kryer krime kundër njerëzimit në këtë fshat.
Krime të vërteta me operacionin e tyre anti-drogë. Bandat kriminale me uniformë nuk kanë ngurruar të vendosin tytën e automatikut fëmijës 2-3 vjeçar, nënës që mbronte fëmijët, kryeplakut të fshatit t’i shkrehin breshëritë pse bënte detyrën.
Një terrorizëm të tillë Lazarati nuk e ka parë kurrë në jetën e tij. Unë i garantoj banorët se shumë shpejt do organizoj skuadra dhe grupe hetime për të mbledhur dhe evidentuar këto krime. Edi Ramës i them se do marrë ndëshkimin e merituar për këto krime. Ne mbetemi parti e zbatimit të ligjit, por nuk mund të pranojmë kurrë brutalitete ndaj personave pa asnjë lidhje me operacionin e tyre”.
