Ish-kryeministri Sali Berisha u ka bërë thirrje të gjithë socialistëve që të largojnë me urgjencë Edi Ramën, përndryshe do e largojë populli me forcë.
Gjatë një prononcimi për mediat, Berisha komentoi edhe kritikat e shumta të ndërkombëtarëve, teksa tha se i mirëkupton ato, ndërsa i ftoi që të vinin në Tiranë dhe ta shihnin realitetin me sy.
“U bëj thirrje socialistëve, mos nënvlerësoni situatën. Dënimi për Ramën po afron dhe do jetë tepër i rëndë. T’i thërrasin mendjes, të mos lejojnë përshkallëzim”, tha ndër të tjera Berisha.
Këto deklarata, ish-kryeministri i bëri pas vizitës së një ekspozite të piktorit Delvina.
“U bëj thirrje socialistëve të largojnë me urgjencë Edi Ramën dhe klikën e tij nga pushteti, mbasi e them me bindjen më të thellë se urrejtja ndaj Edi Ramës dhe regjimit të tij bëhet çdo ditë e më e pakufishme. Kom konstatuar më 16 atë urrejtje që e kam takue vetëm në 1990, 1991 ndaj diktatorëve dhe diktaturës. U bëj thirrje socialistëve, mos nënvlerësoni situatën. Dënimi për Ramën po afron dhe do jetë tepër i rëndë. T’i thërrasin mendjes, të mos lejojnë përshkallëzim. Ky revolucion i filluar nga studentët, ata kanë një meritë historike sepse guxuan dhe mbushën sheshet. Në çdo sallë e zbërthyen, e nxorën lakuriq më keq se në plazhet e botës. Çdo javë e Ramës në pushtet është rrezik kombëtar madhor. Kam mirëkuptim për kritikët. U bëj thirrje të vijnë të shohin realitetin këtu në Shqipëri, në Tiranë. Janë dy raporte të KE që i japin Shqipërisë hapjen e negociatave.
Unë nuk luftoj për pushtet, kam dhënë dorëheqjen. Të largohet se do e përzënë njerëzit në mënyrë të paimagjinueshme. Ka 6 vjet që poshtëron çdo ditë shqiptarët”./ TIRANA TODAY
