Kombëtarja është duke u stërvitur në Durrës për miqësoren e së hënës përballë Norvegjisë në “Elbasan Arena”. Problemi i vetëm për Panuccin duket është porta, pasi Etrit Berisha është stërvitur i diferencuar nga grupi dhe ka munguar në një ndeshje kontrolli të zhvilluar të enjten. Në konferencën për shtyp ditën e sotme ka dalë gardiani kuqezi Etrit Berisha i cila ka pohuar se ai ndjehet në formë dhe së e ka lënë dëmtimin pas. Ai ka folur gjithashtu edhe për rivalitetin me Strakoshën, ku e cilëson si gjënë më të mirë që ndodh në ekip, pasi kushdo që të jetë në portë ajo do të jetë e sigurt.
“Po rikuperohem nga një dëmtim. Unë ndihem mire, por do të jetë stafi, ai që do të vendosë nëse do të luaj apo jo ndaj Norvegjisë. Personalisht, besoj se do t’ia dal dhe do të jem i gatshëm për të luajtur. Seancat stërvitore kanë shkuar mirë dhe grupi është shumë i motivuar për të bërë më të mirën në këtë ndeshje.
Jemi të gjithë optimistë dhe besoj se do të vazhdojmë të tregojmë një formë të mirë. Ka kohë për të menduar për Izraelin, për Skocinë dhe për Ligën e Kombeve. Përqendrimi ynë për momentin është vetëm te sfida ndaj Norvegjisë, pasi duam të vazhdojmë të paraqitemi në të njëjtën mënyrë si ndaj Turqisë dhe, pse jo, të fitojmë.
Liga e Kombeve? Jemi në një grup, që na jep mundësi kualifikimi. Skocia është një kundërshtar i vështirë, ashtu si edhe Izraeli, megjithatë, mendoj se e kemi forcën për t’i mposhtur këto dy përfaqësuese dhe për ta kaluar grupin.
Rivaliteti me Strakoshën? Thoma e njoh që nga koha që kam qenë te Lazio dhe gjithmonë kam patur një marrëdhënie shumë të mirë me të. Gjëja më e mirë në kombëtare është konkurrenca. Kushdo që të luajë, porta do të jetë e garantuar. Unë apo Strakosha është trajneri që vendos”.
