Ish-kryeministri Berisha ka risjellë në fokus në Kuvend, situatën e rënduar në Ukrainë ku raportohet për viktima e të plagosur. Ai tha se është turp që ky Kuvend nuk miraton një rezolutë për situatën në Ukrainë, duke e cilësuar Ramën si vasal të Vuçiç. Tejet i shqetësuar, Berisha deklaroi se në Ukrainë po bien bomba mbi njerëzit e lirë, ndërsa në Shqipëri nuk miratojnë një rezolutë të përbashkët për dënimin e këtij agresioni.
“Dënojmë me ashpërsinë më të madhe agresionin rus. Shqipëria, ky Parlament mban të njëjtin qëndrim si Parlamenti i Rusisë së vogël, apo Serbisë. Kjo është e turpshme. Si mund të justifikojë këtë qëndrim ky Parlament ndaj një vendi që historikisht u ka bërë shqiptarëve të këqijat më të mëdha të kohërave.
Çfarë ndodh këtu? Kjo është dëshmi e vasalitetit të plotë ndaj Beogradit. Si ka mundësi, atje po bien bomba mbi njerëzit e lirë, kurse ne nuk miratojmë një rezolutë të përbashkët për dënimin e këtij agresioni.
Kjo është histori turpi, kapitullimi. Natyrisht ka një përgjegjës dhe ky është Edi Rama, vasal i Vuçiç. I shpreh solidaritetin tim të plotë popullit ukrainas, vdekje pushtuesit rus”, deklaroi Berisha.
