Ish-kryeministri Sali Berisha ka deklaruar në “Çim Peka Live” se Lulzim Basha e Enkelejd Alibeaj kanë pasur si qëllim që të ndërtojnë partinë e tyre. Berisha tha se Basha dhe Alibeaj bëjnë gjithçka që nëpërmjet Ramës, të hedhin poshtë Kuvendin e 11 dhjetorit. “Ishte një gjë më e thellë që të themi të vërtetën. Basha dhe Alibeaj janë angazhuar në një proces të turpshëm të manipulimit të grupit parlamentar. Kjo është 100 % e sigurt. Ata i lejuan vetes të vazhdojnë të mbajnë qëndrimin për mosnjohjen e Kuvendit të 11 dhjetorit. Këtu fillon cdo gjë. Së pari Basha dhe Alibeaj bëjnë gjithçka që nëpërmjet Ramës të hedhin poshtë Kuvendin e 11 dhjetorit, votimin e 6 marsit. Ata po bëjnë gjithçka të bëjnë partinë e tyre”, tha Berisha.
Prej ditësh Komisioni i Rithemelimit në Partinë Demokratike me në krye Sali Berishën, po zhvillon zgjedhjet për krerët lokal të degëve, ku fituesit janë pikërisht kandidatët që mbështesin ish-kryeministrin. Kjo ka bërë që të shtohen zërat e mbështetësve të Bashës, se në këto zgjedhje të mbajtura, janë bërë manipulime të listave nga ana e njerëzve të Berishës, të cilët kanë shtuar anëtarë në listat e degëve të PD dhe kanë larguar disa pjesëtarë të partisë që kanë qenë aty.
