Ministri teknik i Shëndetësisë Arben Beqiri, pas shkarkimit nga detyra të drejtorit të Spitalit Rajonal në Berat, emëroi në këtë detyrë Arqile Vasilin.
Komunikimi është bërë nga vet ministri, gjatë një takimi me personelin e këtij spitali.
Sakaq, ish-drejtori Idlir Frashëri është kallëzuar në Prokurori nga Zv/kryeministrja teknike, Ledina Mandia. Në njoftimin për shtyp të zyrës së kryeministrisë thuhet se, “Sektori për Hetimin e Korrupsionit në Policinë e Shtetit në bazë të një denoncimi ka filluar procedimin penal ndaj Drejtorit të Spitalit Rajonal të Beratit, i cili në bashkëpunim me disa punonjës të këtij spitali dhe më një deputet të zonës kanë arritur të konsumojnë veprën penale të korrupsionit aktiv në zgjedhje, si dhe përdorimit të funksioneve publike në veprimtari politike ose zgjedhore të parashikuara nga neni 328 dhe 328/a të Kodit Penal të ndryshuar.
Në këtë kushte, unë i bëj thirrje Prokurorisë së Përgjithshme të marrë të gjitha masat për të ndjekur procedurat sipas ligjit dhe për të arritur në një konkluzion përfundimtar në lidhje me procedurat e filluara dhe të iniciuara nga ana e Sektorit të Hetimit dhe Korrupsionit”
