Enkeleda Kapedani u emërua në krye të gjykatës së Elbasanit në 2020, ndërsa është betuar si gjyqtare në vitin 2015 para Bujar Nishanit. ILD ka ngritur grupin e punës që do të kryejë hetimin disiplinor ndaj kryegjyqtares së Elbasanit, Enkeleda Kapedani, pas videove të papërshtatshme në zyrën e punës.
Kryetarja e Gjykatës së Elbasanit, Enkeleda Kapedani, do të përballet me një hetim disiplinor. Shkak u bënë disa video, ku gjyqtarja shfaqet me veshje të shtrenjta dhe makina luksi, apo edhe duke sfiluar në ambientet e gjykatës.
Kodi Etik
KLGJ miratoi një muaj më parë Kodin Etik të gjyqtarëve, duke kërkuar prej tyre që të sillen sipas pritshmërive që ka publiku ndaj anëtarëve të Sistemit të Drejtësisë, aq më tepër në një situatë ku jemi ende duke bërë operacionin e madh të Reformës në Drejtësi.
Referuar këtij Kodi, Kapedani duket se ka shkelur pjesën ku flitet për “Sjelljen e hijshme dhe me vetëpërmbajtje”, e cila stimulon gjyqtarët që përmes figurës së tyre të rrisin besimin e qytetarëve te drejtësia.
Kryetarja e Gjykatës së Elbasanit: Do pres me qetësi verifikimin e kësaj situate!
Kryetarja e Gjykatës së Elbasanit, Enkeleda Kapedani, thotë se nuk ndihet krenare për videot dhe sipas saj, ato janë publikuar për të dëmtuar imazhin e saj. Kapedani shprehet në reagim se do të presë me qetësi verifikimin e situatës.
“Qëndrimi im në lidhje me shpërndarjen e disa vidiove nëpër media. Si gjyqtare në radhë të parë dhe si nënkryetare e Gjykatës ndjehem keq nga publikimi i këtyre videove vetëm për të më dëmtuar imazhin. Unë si gjyqtare e kam të ndaluar të komentoj, por do pres me qetësi verifikimin e kësaj situate. As si individ, as si gjyqtare nuk jam krenare për videot e publikuara. Shpresoj që ky sulm mos të jetë ndaj meje, sepse jam grua dhe nënë. Ndërsa kërkoj ndjesë për cilindo që është ndjerë keq nga ato video. Dua të theksoj me forcë se asnjë insinuatë apo përbaltje nuk do më influencojnë të japë drejtësi dhe të punoj ndershmërisht si deri më sot”.
