Pesë persona janë proceduar në gjendje të lirë nga Policia e Pogradecit, pasi dyshohet se kanë ushtruar dhunë fizike ndaj pronarit të një lokali në fshatin Dunicë.
Sipas njoftimit të policisë, procedimi ndaj tyre filloi pasi akuzohen se kanë goditur me grushte 39-vjeçarin me iniciale E.Ç, si edhe kanë thyer xhamat e lokalit në pronësi të tij.
Materialet në ngarkim të tyre i kaluan Prokurorisë pranë Gjykatës së Shkallës së Parë Pogradec për veprat penale “Plagosja e lehtë me dashje” dhe “Shkatërrimi i pronës”.
“Në vijim të informacionit datë 09.11.2019, i cili bën fjalë për konfliktin e ndodhur në një lokal, në fshatin Dunicë. Specialistët e Seksionit për Hetimin e Krimeve, në Komisariatin e Policisë Pogradec pas veprimeve hetimore të kryera me qëllim zbardhjen e plotë të rrethanave të kësaj ngjarje, filluan procedimin penal në gjendje të lirë edhe ndaj 5 shtetasve të tjerë, të dyshuar si të përfshirë në konflikt, konkretisht:
S.M.,26 vjeç; E.M., 28 vjeç; A.S., 25 vjeç; F.M., 26 vjeç, Ç.K, 26 vjeç, banues në fshatin Memëlisht dhe Çervenakë, Pogradec”, thuhet ndër të tjera në reagimin e policisë.
