Belgjika ka zhvilluar një ndeshje të madhe përballë Brazilit duke i eliminuar këtë të fundit nga Botërori i Rusisë dhe në gjysmëfinale do të jenë belgët e Martinez. Merr formë dhe gjysmëfinalja e parë e cila do të zhvillohet mes Francës dhe Belgjikës. Brazili nuk e theu dot mallkimin e Meksikës, pasi çdo kombëtare që i kishte eliminuar ata nuk e kishte fituar Botërorin.
Belgët me një mori talentesh, pasi kanë grupin e lojtarëve më të mirë në kombëtaren e tyre kanë bërë një hap historik duke kaluar në gjysmëfinale që nga viti i largët 1986, ku më pas u mposhtën nga Argjentina.
Në Kazan Arena sfida nis me një lojë të hapur, por Brazili kishte disa raste të mira për shënim, por shtylla dhe Courtois ua ka mohuar atë. Në minutën e 13’ një brazilian bëhet protagonist, por goli shënohet në portën e gabuar dhe festa është e belgëve, ishte Fernandinho që devijon topin në portën e të tijve.
Pak minuta nga fundi i pjesës së parë belgët organizojnë një kundërsulm mjaft të bukur me Lukakun, i cili shërben për De Bruyne dhe ky i fundit godet mjaft mirë duke e ndalur topin në rrjetë. Një gol mjaft i bukur nga mesfushori i Manchester Cityt. Ai u bë futbollisti i 100-të që shënon në këtë Botëror, i nënti për Belgjikën dhe shënoi golin e 150 të Kupës së Botës.
15 minuta para fundit, Renato Augusto, i sapofutur në fushën e lojës, realizoi për Brazilin, me një goditje të saktë me kokë, pas pasimit të marrë nga Coutinho. Më pas, Augusto humbi mundësinë ideale për të realizuar barazimin.
Në sekondat e fundit belgët iu falën edhe një pritje të jashtëzakonshme të Courtois gjatë tentativës së Neymar. Pas Gjermanisë, Argjentinës dhe Spanjës, pesë herë kampionët e Botës bëhen skuadra tjetër pretendente që do ta shohë pjesën e mbetur të Kupës së Botës 2018 nga televizioni.
