Transferimi i Cristiano Ronaldos drejt Juventusit mendohej se ishte thjeshtë çështje kohe, por presidenti Florentino Perez është njeriu që ka në dorë gjithçka. Numri një i madrilenëve momentalisht ka frenuar transaksionin.
Është “La Stampa” që ka zbuluar se presidenti i Real Madrid nuk është aspak i kënaqur me atë që po bën Ronaldo dhe menaxheri i tij Mendes. Për këtë arsye ai i ka kërkuar yllit portugez që të dalë dhe të deklarojë publikisht se cilat janë arsyet e këtij largimi, me qëllim që të mos dobësohet pozicioni i tij edhe më shumë pas largimit të Zidane.
Për të gjitha këto arsye, sipas gazetës italiane, presidenti Florentino Perez nuk pranon ofertën prej 100 milionë euro që Juventus do të investonte në këtë transaksion. “Kërkon 150 milionë dhe negocion, por sipas bashkëpunëtorëve të tij nuk do të pranojë më pak se 130 milionë euro”, citon “La Stampa”. Një detaj ky që nuk demoralizon Juventusin në objektivin për blerjen e Ronaldos, por padyshim që ngadalëson transferimin e portugezit.
