Ish-deputeti i LSI, Shezai Rrokaj, ka deklaruar në studion e lajmeve në RTV Ora se opozita është e gatshme për bashkëpunim me PS, por kjo e fundit të mos ketë statusin e qeverisë. Po kështu, ai risolli në fokus edhe protestat nga ana e opozitës, e ndërsa apeloi ndaj mazhorancës që të hedhë hapin e para drejt bashkëpunimit.
“Opozita gjithmonë e ka shprehur vullnetin e saj për një marrëveshje me PS, një marrëveshje duke mos njohur statusin e qeverisë së kësaj mazhorance, sepse sipas opozitës, kjo qeveri ka ardhur në pushtet me vota të blera. Këtë shtator, opozita do të vazhdojë aksionin opozitar të protestës. Opozita ka propozuar pikat e para të bashkëpunimit politik me mazhorancën, në 3 drejtimet themelore, që është Vettingu në politikë, dekriminalizimi i ekonomisë dhe dekriminalizimit të zgjedhjeve.
Ky shtator duhet të jetë një apel, refleksion i thellë për mazhorancën e cila duhet të hedhë hapin e parë të bashkëpunimit. Bashkëpunimi nuk mund të vendoset mes një kryetari partie që përfaqëson opozitën që është Basha dhe kryeministri. Bashkëpunimi bëhet në rangje politike, kryetarë partish”.
Rrokaj tha se opozita duhet të vazhdojë me ngulm protestat, dhe ti paraqesë shqiptarëve alternativën më të mirë qeverisëse.
“Mazhoranca nuk mund të vazhdojë të bëjë sikur është në shinat e drejta të demokracisë, nga ana tjetër opozita duhet të vazhdojë me ngulm protestat dhe bashkëpunimin me ndërkombëtarët, për ti sensibilizuar më shumë ndërkombëtarët. Mbi të gjitha opozita duhet të ketë dy detyra themelore, çfarë u propozon gjë të re shqiptarëve, dhe me cilin ekip ajo kërkon besimin e qytetarëve shqiptarë në qeverisjen e ardhshme. Kjo rrugë shpie në rritjen e fluksit të atyre që e kërkojnë ndryshimin”.
