Zëdhënësja e BE-së, Maja Koçijançiç tha sot se është një zhvillim pozitiv marrëveshja për një samit mes presidentit amerikan, Donald Trump dhe liderit koreano-verior, Kim Jong Un.
Deklarata e Koçijançiç u bë gjatë konferencës së përditshme për shtyp të Komisionit. Ajo përshëndeti edhe zhvillimet e fundit pozitive në marrëdhëniet midis dy Koreve.
”Fakti që presidenti Trump është i hapur për të pranuar ftesën e Kim Jong Un për një samit përbën gjithashtu një zhvillim pozitiv”, shtoi Koçijançiç.
Pas disa muajsh te deklaratave armiqësore, duket se më në fund do të kemi një hap pozitiv mes dy super fuqive, teksa pritet që të mbahet një takim historik mes Donald Trump dhe Kim Jong-un. Lajmin e bëri të ditur një delegacion i Koresë së Jugut, pas bisedimeve me Donald Trump në Shtëpinë e Bardhë.
Ata kaluan një mesazh verbal nga Kim Jong-un, teksa thanë se lideri i Koresë së Veriut ishte “i angazhuar për denuklearizim”.
Trump përshëndeti ‘progresin e madh’, ndërsa tha se sanksionet do të mbeten në vend. Presidenti i Koresë së Jugut, Moon Jae-in tha se ‘lajmi erdhi si një mrekulli’.